Beruniy nomidagi xalqaro mukofot taʼsis etiladi
Bu bo‘yicha Prezident qarori qabul qilindi.
"Buyuk mutafakkir va qomusiy olim Abu Rayhon Beruniy tavalludining 1050 yilligini xalqaro miqyosda keng nishonlash to‘g‘risida"gi qarorga ko‘ra, 2022-2023 yillarda buyuk mutafakkir va qomusiy olim Abu Rayhon Beruniy tavalludining 1050 yilligi UNESCO shafeligida xalqaro miqyosda keng nishonlanadi.
Shunga asosan, jumladan:
"Buyuk Beruniy merosi" xalqaro sayyohlik marshrutlari yo‘lga qo‘yiladi;
2023 yil yakunigacha Qoraqalpog‘iston Respublikasi Beruniy tumanida Abu Rayhon Beruniy majmuasi quriladi;
alloma ilmiy-ijodiy merosiga mansub qo‘lyozma va boshqa madaniy boyliklar restavratsiya qilinadi;
Fanlar akademiyasining Qoraqalpog‘iston bo‘limi va Xorazm Maʼmun akademiyasida madaniy meros obyektlarini restavratsiya qilish va konservatsiya qilishga ixtisoslashgan laboratoriya tashkil qilinadi;
o‘quvchilar o‘rtasida Xorazm viloyatida tegishli fan bo‘yicha Abu Rayhon Beruniy nomidagi xalqaro fan olimpiadasi o‘tkaziladi.
Shuningdek, Abu Rayhon Beruniy nomidagi xalqaro mukofot taʼsis etiladi. 2022 yil dekabrgacha "Beruniy va yoshlar" maxsus dasturi ishlab chiqilib, mutafakkir hayotiga oid maʼlumotlar, uning ilmiy-maʼrifiy asarlari jamlangan mobil ilova yaratiladi.
Qarorga ko‘ra, allomaning to‘liq asarlari turkumini o‘zbek, qoraqalpoq, rus, ingliz, arab va fors tillarida nashr etish choralari ko‘riladi.
