Norvegiya Rossiyaga qarshi sanksiyalarning 7-paketiga qo‘shildi
“Biz Rossiyaga nisbatan bosimni saqlab qolmoqchimiz”, deydi mamlakat tashqi ishlar vaziri.
Norvegiya joriy yilning 21-iyul kuni Rossiyaga qarshi kiritilgan Yevroittifoq sanksiyalarining yettinchi paketiga qo‘shildi. Bu haqda mamlakat tashqi ishlar vazirligi bayonotida ma’lum qilingan.
“Biz Rossiya rahbariyati va rus elitasi vakillariga bosimni saqlab qolish uchun sanksiyalarni qo‘llash bo‘yicha yana bir bor YeI bilan hamkorlikda harakat qilmoqdamiz”,— degan Qirollik tashqi ishlar vaziri.
Norvegiya qo‘shilgan mazkur sanksiyalar Rossiya bilan biznes yuritish imkoniyatlarini yanada kamaytiradi. Bundan tashqari, 50 dan ortiq jismoniy shaxsga va 10 ta yuridik shaxsga nisabatan cheklovlar joriy etiladi. Ular orasida Rossiya Sverbanki ham bor.
Shuningdek, yettinchi sanksiyalar paketi oltinni to‘g‘ridan-to‘g‘ri va bilvosita olib kirish, sotib olish yoki o‘tkazishni taqiqlashni nazarda tutadi.
