Niagara sharsharasida O‘zbekiston bayrog‘i ranglari aks etadi
Buni jonli efirda tomosha qilish mumkin.
O‘zbekiston davlat mustaqilligining 31 yilligi munosabati bilan 1 sentyabr kuni Kanadada va Shimoliy Amerikadagi eng mashhur sayyohlik joylaridan biri — Niagara sharsharasida O‘zbekiston davlat bayrog‘i ranglari aks etadi. Bu haqda “Dunyo” axborot agentligi xabar berdi.
O‘zbekistonning Kanadadagi elchixonasi maʼlumotlariga ko‘ra, sharsharani 31 avgust kuni mahalliy vaqt bilan soat 22:30 (Toshkent vaqti bilan 1 sentyabr, soat 7:30)da jonli efirda tomosha qilish mumkin.
Shuningdek, O‘zbekiston diplomatik missiyasi vatandoshlar bilan birgalikda Niagara shahrida Mustaqillik bayramini keng nishonlashni rejalashtirayotgani taʼkidlangan. O‘zbek raqs va qo‘shiqlari, anʼanaviy o‘zbek palovi bilan tantanali ziyofat tashkil etiladi.
Eslatib o‘tamiz, Niagara sharsharasi o‘tgan yili O‘zbekiston Mustaqilligining 30 yilligi munosabati bilan ilk bor O‘zbekiston bayrog‘i ranglariga bo‘yalgan edi.
