Bugundan “Muzeylar haftaligi”ga start berildi
Madaniy meros agentligi kirish bepul bo‘lgan muzeylar ro‘yxatini e’lon qildi.
Bugun, 2-sentabrdan e’tiboran “Muzeylar haftaligi” tadbiri boshlanadi, deya xabar bermoqda Madaniy meros agentligi matbuot xizmati.
Ma’lum qilinishicha, quyidagi muzeylarga 7 kun davomida bepul kirish mumkin:
—O‘zbekiston davlat san’at muzeyi;
—Abdulla Qodiriy uy-muzeyi;
—Yunus Rajabiy uy-muzeyi;
—O‘rol Tansiqboyev uy-muzeyi;
—Tamaraxonim uy-muzeyi;
—Sergey Yesenin uy-muzeyi.
“Hamyurtlarimiz bir hafta davomida muzeylarga tashrif buyurib, milliy muzey fondiga kiritilgan ashyolar va kolleksiyalar bilan tanishib olishlari mumkin”, — deyiladi xabarda.
Eslatib o‘tamiz, Vazirlar Mahkamasining 2010-yil 12-apreldagi qarorining 8-ilovasi nizomiga ko‘ra, “Muzeylar haftaligi” tadbiri har yili 2—8 sentabr kunlari o‘tkazilishi belgilab qo‘yilgan. Shuningdek, har oyning birinchi yakshanbasida ham muzeylarda “ochiq eshiklar kuni” o‘tkaziladi.
