Maktab darsliklari ijara narxi bir yilda 108 foizga oshdi
Holat yuzasidan XTV rasmiy izoh berdi.
Respublika maqsadli kitob jamg‘armasining Vasiylik kengashi darsliklar va mashq daftarlarining ijara to‘lovi miqdorlarini belgiladi. Bu haqda Xalq ta’limi vazirligi Matbuot xizmati xabar qildi.
Qayd etilishicha, joriy yilda Prezident Farmoni bilan umumta’lim maktablarining 3-, 6-, 7- va 10-sinflari uchun to‘liq, shuningdek 2- va 3-sinf uchun mashq daftarlari, barcha sinflar uchun ingliz tili, nemis tili va rus tili fanlaridan jami 60 million nusxa yangi avlod darsliklari (2021-yilda 25 million darslik) chop etilmoqda.
Joriy o‘quv yilida o‘rtacha bir dona darslik (mashq daftari) uchun yagona ijara to‘lovi 5707 so‘mni tashkil etmoqda va o‘tgan o‘quv yilidagi miqdorga nisbatan 2967 so‘mga (108 foizga) oshgan.
“Yangi darsliklarning chop etilish xarajatlarining, xususan dunyo bozorida qog‘oz narxi (faqatgina 2022-yilning o‘zida qog‘oz narxi 60-70 foizga oshgan) va qog‘ozni mamlakatimizga yetkazib berish bo‘yicha transport хarajatlarining keskin oshib ketishi, tabiiyki darsliklarni chop etish uchun xarajatlarning ham oshib ketishiga olib keldi”, — deyiladi xabarda.
Ijara to‘lovi summasini ota-onalar darslik to‘plamini to‘liq olgach 1-oktabrga qadar amalga oshirishlari mumkin.
Eslatib o‘tamiz, quyidagi fuqarolar darslik ijara to‘lovidan ozod etiladi:
— birinchi sinf o‘quvchilari;
—“Ijtimoiy himoya yagona reyestri” axborot tizimiga kiritilgan oilalarning farzandlari;
—“Mehribonlik uy”lari tarbiyalanuvchilari;
—Jismoniy yoki ruhiy rivojlanishida nuqsoni bo‘lgan bolalar uchun ixtisoslashtirilgan maktab va maktab-internatlari o‘quvchilari.
