Navoiyda o‘qituvchilar bayram kunlari navbatchilikka qo‘yildi
Bu profilaktika inspektorining og‘zaki buyrug‘i bilan amalga oshirilgan.
Ijtimoiy tarmoqda Navoiy viloyatining Xatirchi tumanida 22-umumiy o‘rta ta’lim maktabi o‘qituvchilari bayoram kunlarida kuchaytirilgan navbatchilikka jalb etilgani haqida xabarlar tarqaldi. Holat yuzasidan tuman XTB rasmiy munosabat bildirdi.
Aniqlanishicha, hudud profilaktika inspektori tomonidan O‘zbekiston Respublikasi Mustaqilligining 31 yilligi munosabati bilan bayram kunlari maktablarda tunu kun navbatchilikni joriy etish to‘g‘risida og‘zaki topshiriq berilgan. O‘z navbatida u maktab direktorlariga telefon orqali topshiriqni yetkazgan va ro‘yxat tashlab berishni so‘ragan. Shu tariqa maktablarda 2022-yilning 31-avgustidan 2022-yil 5-sentyabrigacha ro‘yxat shakllantirilgan.
Maktab o‘qituvchilari bilan o‘tkazilgan surishtiruv natijasida ro‘yxat shunchaki rasmiyatchilik uchun tuzilgani, birorta o‘qituvchi qayd etilgan kunlarda navbatchilikda turmagani ma’lum bo‘lgan.
Mazkur holat yuzasidan maktabning CHQBT rahbari N.Ruziyev hamda direktor J.Qarshiyev ogohlantirilgan.
