Navoiydagi bog‘chada bolalar ommaviy zaharlangani aytildi
Holatga viloyat prokuratuasi izoh berdi.
Ijtimoiy tarmoqlarda Navoiy viloyatining Karmana tumanidagi 6-sonli MTTda bolalar ommaviy zaharlangani haqida xabarlar tarqaldi. Holat yuzasidan viloyat prokuraturasi rasmiy munosabat bildirdi.
Qayd etilishicha, 9-sentabr kuni soat 17:00 da Karmana tuman tibbiyot birlashmasi yuqumli kasalliklar bo‘limiga 10 nafar voyaga yetmagan bola umumiy holsizlik, qusish va ich ketishi kabi klinik belgilar bilan yotqizilgan.
Ushbu belgilar bo‘yicha bemorlarga yuqumli kasalliklar bo‘limi tomonidan “oshqozon-ichak faoliyatining buzilishi” tashxisi qo‘yilib, ularning 9 nafariga birinchi tez tibbiy yordam ko‘rsatilgan va ahvoli qoniqarli bo‘lganligi sababli kasalxonadan chiqarilgan.
Hozirda 1 nafar bola o‘tkir resperator, yuqori nafas yo‘llarining shamollashi tashhisi bilan davolanmoqda.
Mazkur holat yuzasidan Karmana tuman prokuraturasi tomonidan tergovga qadar tekshirish harakatlari olib borilayotgan bo‘lib, ekspertiza tekshiruvi uchun tegishli namunalar olinib, sud-tibbiy ekspertizasi tayinlangan.
“Tergovga qadar tekshirish natijasi bo‘yicha qonuniy qaror qabul qilinishi ta’minlanadi”, — deyiladi xabarda.
