O‘zbekistonning SHHTdagi tashabbuslari 54 taga yetdi
Bugungacha ularning asosiy qismi amaliyotga joriy etilgan.
O‘zbekiston shu paytga qadar uch marta SHHTga raislik qilgan. Mana shu davrlarda O‘zbekiston 54 ta tashabbusni ilgari surdi va ularning asosiy qismi amaliyotga joriy etildi.
Masalan, SHHT doirasida mintaqaviy aksilterror tuzilmasini tashkil etish O‘zbekistonning taklifi va bu tuzilma Toshkent shahrida faoliyat olib bormoqda.
Yana bir muhim tashabbus – SHHTga yangi a’zolarni qabul qilish mexanizmini ishlab chiqish bo‘lgan. Shundan so‘ng Hindiston va Pokiston tashkilotga a’zo bo‘ldi, Eron ham SHHTning to‘laqonli a’zosiga aylanish arafasida.
Hindiston va Pokistonning a’zoligi tashkilotga Janubiy Osiyo eshiklarini ochgan bo‘lsa, Eronning qo‘shilishi Yaqin sharq eshiklarini ochadi.
O‘zbekistonning 2017-yildan keyingi tashabbuslari nafaqat xavfsizlik, balki iqtisodiy, transport-logistika, madaniy-gumanitar, turizm sohalaridagi hamkorlikni rivojlantirishga xizmat qilyapti.
