Nikol Pashinyan Samarqanddagi SHHT sammitida qatnashmaydi
Bunga chegaradagi vaziyat sabab bo‘lgan.
Armaniston Bosh vaziri Nikol Pashinyan mamlakatdagi vaziyat tufayli Samarqandda bo‘lib o‘tadigan SHHT sammitida ishtirok etmaydi. Bu haqda hukumat matbuot xizmati xabar qildi.
Eslatib o‘tamiz, 13-sentabrga o‘tar kechasi Ozarbayjon-Armaniston chegarasida harbiy to‘qnashuv yuz bergandi. Tomonlar o‘q otishni boshlaganlikda bir-birini ayblagan.
Bunga O‘zbekiston TIV munosabat bildirib, vaziyatdan chiqish uchun siyosiy va diplomatik muzokaralar olib borishga da’vat etgandi.
“O‘zbekistonning ishonchi komilki, barcha masalalar va mavjud muammolarni hal qilishning yagona to‘g‘ri yo‘li bu xalqaro huquq asosida va ilgari erishilgan kelishuvlar doirasida tinchlik muzokaralari va maslahatlashuvlar yo‘lidir.
Biz tinchlik shartlariga qat’iy rioya qilinishi, har qanday sharoitda ham vazminlikning namoyon bo‘lishiga umid qilamiz hamda tomonlarni mavjud ahvolni barqarorlashtirish, vaziyatdan chiqish uchun siyosiy va diplomatik muzokaralar olib borishga da’vat etamiz”, — deyiladi vazirlik bayonotida.
