Navoiydagi xonadonda odam skeleti topildi
Uni uy egasi yerni kovlayotgan vaqtida ko‘rib qolgan.
Ijtimoiy tarmoqda Navoiy viloyatining Xatirchi tumanidagi xonadonlarning biridan yerga ko‘mib yuborilgan odam skeleti topib olingani haqida xabarlar tarqaldi. Holat yuzasidan viloyat prokuraturasi rasmiy bayonot e’lon qildi.
Aniqlanishicha, Xatirchi tumanida yashovchi fuqaro R.Z. joriy yilning 16-sentabr kuni yashash xonadoni hovlisida ekin yerini kovlayotgan vaqtida odam suyagiga o‘xshash suyaklar chiqqanini huquqni muhofaza qiluvchi organlarga ma’lum qilgan.
Hozirda mazkur holat yuzasidan Xatirchi tuman prokuraturasi tomonidan tergovga qadar tekshiruv harakatlari olib borilmoqda. Tekshiruv uchun tegishli namunalar olingan va sud-tibbiy kriminalistik ekspertizalari tayinlangan.
“Tergovga qadar tekshirish natijasi bo‘yicha qonuniy qaror qabul qilinishi ta’minlanadi”, — deyiladi xabarda.
