Konstitutsiyaning OAVga oid moddasi to‘ldirilmoqda
Unda jurnalistlar faoliyatiga to‘sqinlik qilish javobgarlikka sabab bo‘lishi belgilab qo‘yilmoqda.
29-sentyabr kuni Konstitutsiyaviy komissiya Matbuot xizmati tomonidan konstitutsiyaviy islohotlarning borishi yuzasidan ommaviy axborot vositalari vakillari uchun brifing o‘tkazildi.
Unda Konstitutsiyaning Ommaviy axborot vositalari hamda jurnalistik faoliyatga oid 67-moddasi to‘ldirilayotgani ma’lum qilindi.
Qayd etilishicha, Konstitutsiyaviy qonun loyihasining 67-moddasida “Davlat ommaviy axborot vositalari faoliyatining erkinligini, ularning axborotni izlash, olish, axborotdan foydalanish va uni tarqatishga bo‘lgan huquqlari amalga oshirilishini kafolatlaydi. Ommaviy axborot vositalarining va jurnalistlarning faoliyatiga to‘sqinlik qilish yoki aralashish qonunga muvofiq javobgarlikka sabab bo‘ladi. Ommaviy axborot vositalari o‘zlari taqdim etadigan axborotning to‘g‘riligi uchun javobgardir”, degan yangi normani qo‘shimcha tarzda kiritish ko‘zda tutilyapti.
Brifingda, shuningdek, qonun loyihasining matni tayyor bo‘lishi bilan u deputatlar muhokamasiga kiritilishi, xalq vakillarining fikrlari e’tiborga olingan holda keyinchalik tayyor bo‘ladigan Konstitutsiyaviy qonun loyihasi referendumga qo‘yilishi ma’lum qilindi.
