Pokistondagi toshqinlarda 1700 ga yaqin odam halok bo‘ldi
Shuningdek, 2 mlndan ortiq uyga shikast yetgan.
Pokistonda iyun oyi o‘rtalarida boshlangan musson yomg‘irlari va toshqinlar oqibatida qurbon bo‘lganlarning umumiy soni 1695 kishiga yetdi, yana 12 865 kishi jarohat olgan.
Tabiiy ofatlarni boshqarish milliy boshqarmasi hisobotiga ko‘ra, tabiiy ofatda 630 nafar bola va 340 nafar ayol halok bo‘lgan.
Janubdagi Sind viloyati eng ko‘p jabr ko‘rgan. U yerda halok bo‘lganlar soni 759 kishiga yetdi. Janubi-g‘arbiy Balujiston va shimoli-g‘arbidagi Xayber-Paxtunxvada mos ravishda 336 va 307 kishi halok bo‘ldi.
“Bundan tashqari, Pokistonning turli mintaqalarida 2 045 349 ta uy vayron bo‘lgan, 1 162 122 bosh chorva mollari nobud bo‘lgan”, — deyiladi xabarda.
84 okrug va 33 046 329 kishi toshqindan jabr ko‘rdi. Yomg‘irlar mavsumi boshlanganidan beri 13 ming kilometrdan ortiq yo‘l va 440 ko‘prik shikastlangan.
