Yagona maktab formasini joriy etish bekor bo‘ldi
Bu bo‘yicha Hukumat qarori qabul qilindi.
Kecha, 3-oktyabr kunim Hukumat qarori bilan “Umumiy o‘rta ta’lim muassasalarida ma’naviy-ma’rifiy hamda tarbiyaviy ishlar samaradorligini oshirish konsepsiyasi” tasdiqlandi. Bu haqda “Huquqiy axborot” telegram kanalida xabar qilindi.
Qaror bilan 2022/2023 o‘quv yilidan davlat umumiy o‘rta ta’lim muassasalarida o‘quvchilarning yagona maktab formasini to‘liq joriy etish talabi bekor qilindi.
Konsepsiya “Yangi O‘zbekistonning yangi maktabi” g‘oyasi asosida maktablardagi ijtimoiy muhitni yaxshilashga qaratilgan chora-tadbirlarni amaliyotga tatbiq etishni nazarda tutadi.
Konsepsiyada belgilangan maqsadga erishish uchun, jumladan, maktablardagi ijtimoiy-ma’naviy muhitni yaxshilashda rahbar va pedagog xodimlar, o‘quvchilar hamda ota-onalarning hamkorligi va mas’uliyatini oshirish asosiy vazifalardan biri hisoblanadi.
Maktab ta’limini umummilliy harakatga aylantirish yo‘nalishi bo‘yicha quyidagi mavzu va g‘oyalar asosida ijodiy ishlar tanlovi, turkum ma’naviy-ma’rifiy, adabiy-badiiy tadbirlar tashkil qilinadi:
1) “O‘zbekiston – Vatanim manim”;
2) “Davlat ramzlari – faxrim, g‘ururim”;
3) “Davlat tili – millat ruhi”.
