COVID-19 butunlay yo‘q bo‘lib ketmaydi—ekspert
Mutaxassislar fikricha, insoniyat koronovirus bilan yashashga majbur.
Dunyoda koronavirusni yuqtirish holatlari 6 foiz, o‘lim ko‘rsatkichi esa 12 foizga kamaydi. Bu haqda Sog‘liqni saqlash vazirligi matbuot xizmati xabar bermoqda.
JSST ma’lumotlariga ko‘ra, o‘tgan haftada koronavirus yana bir qadam ortga chekingan. Garchi bu davrda dunyo bo‘yicha 2,9 milliondan ortiq kishida kasallik aniqlangan bo‘lsa-da, ko‘rsatkichlar 19-25 sentyabr sanalariga qiyoslaganda 6 foizga kamaygan.
Qolaversa, o‘tkazilgan tahlillar natijasida o‘lim holatlari soni 12 foizga pasaygani ma’lum bo‘lgan.
Sezilarli kamayish dinamikasi Afrika (-32 foiz) va Gʻarbiy Tinch okeani mintaqasi (-22 foiz) mamlakatlarida kuzatilgan. Yevropada esa aksincha — 8 foizlik o‘sish qayd etildi. O‘lim holatlarining pasayishi esa barcha mintaqalarda ro‘yxatga olingan.
O‘tgan hafta ichida eng ko‘p bemor Germaniyada aniqlangan — 400 mingdan ziyod kishi. AQSHda xastalikka chalinganlar soni 312 ming, Yaponiyada 306 ming nafardan oshdi. Xitoy (303 ming) va Fransiya (qariyb 265 ming) esa navbatdagi o‘rinlarni band etgan.
Yuqori o‘lim ko‘rsatkichlari bo‘yicha AQSH yana oldinda. Bu yerda xastalik tufayli 2728 kishi hayotdan ko‘z yumgan. Shuningdek, Rossiyada 711, Yaponiyada 563, Xitoyda 368 va Braziliyada 286 nafar bemor koronavirus qurboniga aylangan.
Ekspert Mariya van Kerxovening ta’kidlashicha, COVID-19 butunlay yo‘q bo‘lib ketmaydi va insoniyat u bilan yashashga majbur. Ijobiy jihati esa biz bu xavfli kasallikka qarshi samarali diagnostika va davolash usullari hamda vaksinalarga egamiz.
Kerxovening so‘zlariga ko‘ra, hozir dunyoda “omikron” shtammining BA.5 subvarianti dominant. Xastalikdan asosan emlanmagan aholi qatlami aziyat chekmoqda.
