Navoiydagi qamoqxonada mahkum o‘zini o‘ldirdi
Hozirda holat bo‘yicha sud-tibbiyot ekspertizasi tayinlangan.
Ijtimoiy tarmoqlarda Navoiy shahridagi 4-son jazoni ijro etish koloniyasida mahkum vahshiylarcha o‘ldirilgani haqida xabar tarqaldi. Holat yuzasidan viloyat prokuraturasi rasmiy bayonot e’lon qildi.
Ma’lum bo‘lishicha, mahkum M.O. 7 oktyabr kuni soat taxminan 01:35 larda koloniya intizomiy bo‘linmasining 2-hujrasida kiyimdan arqon yasab, yotish uchun mo‘ljallangan o‘rin joyidagi krovat temiriga o‘zini osib, joniga qasd qilgan.
Mahkum M.O. 2018 yil 30 iyul kuni jinoyat ishlari bo‘yicha Andijon viloyati sudi tomonidan Jinoyat kodeksining 25,97-moddasi 2-qismi “l” bandi, 60, 61-moddalari bilan aybdor deb topilib, 15 yil 1 oy muddatga ozodlikdan mahrum qilish jazosi tayinlangan. Shuningdek, u Jinoyat kodeksining bir nechta moddalari bilan muqaddam 4 marotaba sudlangan.
Mazkur holat yuzasidan Navoiy maxsus prokuraturasi tomonidan tergovga qadar tekshirish harakatlari olib borilmoqda.
