Talabalarimizni xafa qildirmaymiz—Sherzodxon Qudratxo‘ja
O‘zJOKU rektori 1-bosqich talabasining IIBga chaqirilgani bo‘yicha munosabat bildirdi.
Avvalroq ijtimoiy tarmoqlarda ayol kishi talaba-qizlarni ijara uyidan haydab chiqarayotgani va ijaraga ko‘proq pul to‘laydigan boshqa mijozlarni joylashtirmoqchi ekani aks etgan video tarqalgandi.
Holat yuzasidan O‘zbekiston jurnalistika va ommaviy kommunikatsiyalar universiteti rasmiy munosabat bildirib, mazkur video universitetning 1-bosqich talabasi tomonidan ijara uylarning narxi ko‘tarilishi yuzasidan sahnalashtirilgan videosi ekanini ma’lum qilgandi.
Biroz vaqt o‘tib, Toshkent shahar IIBB rolikni suratga olgan 1-kurs talabasini topib, u bilan profilaktik suhbat o‘tkazilgani bo‘yicha ma’lumot berdi. Talaba suhbat davomida videoni suratga olishdan maqsad obunachi ko‘paytirish ekanini, videodagi voqealar sahnalashtirilgani haqida esa hech qanday izoh yozmaganini tan olib, qilgan ishi uchun uzr so‘ragan.
Shundan so‘ng holatga O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘ja ham o‘z munosabatini bildirib, Facebook sahifasida post qoldirdi.
“Talabaga biz ta’lim beramiz, unga kasbiy mahoratga ega bo‘lish va komillik yo‘llariga chiqishida Ustozlik qilamiz!
Kecha maktabni bitirib kelgan o‘spirin bolani 4-6 yilda “proffi” qilamiz. Yaxshi bir kadr tayyorlash uchun ko‘pgina professorlar, dosentlar, amaliyotchilar mashaqqatli mehnat qiladilar. Demakki uni koyishga, ustozlardek nasihat qilishga xaqqimiz bor.
Ammo nechun talabaning professsional faoliyati uchun bizdan o‘tib, bizdan degani — kafedra, dekanat, tyutorlar, rektoratdan so‘ramay, ichki ishlar idorasi, yo boshqa idoralarga “profilaktik suhbat” uchun talabamizni chaqirishadi? Nima uchun buni videoga olib, rolik qilib ijtimoyi tarmoqlarda tarqatishadi? Nimaga “uzr” so‘rashga majburlashadi, yuzini hammaga ko‘rsatib?
Eski zamonlar endi qaytmasligini bilishsin o‘shalar. Yo eplasalar, kelib dars berishsin.
Ertaga bu masala bilan shaxsan o‘zim shug‘ullanaman, qisqa muddatli ishda bo‘lmaganim afsus pand berdi. Talabalarimizni xafa qildirmaymiz, o‘zimiz ta’limu-tarbiya berishga qodirmiz, o‘zimiz yaxshi ish bilan ta’minlaymiz!
“Chumchuq so‘ysayam qassob so‘ysin” bekorga deyishmagin oqillarimiz”, — deydi rektor.
