Germaniya Yevroittifoqni kengaytirishni taklif qildi
“Ittifoq o‘z ta’sirini yanada kuchaytirishi kerak”, — deydi Olaf Shols.
Germaniya kansleri Olaf Shols Yevroittifoqni kengaytirishga chaqirib, ittifoq global masalalarda o‘z ta’sirini yanada kuchaytirishi mumkinligini aytdi. Bu haqda “Reuters” nashri xabar bermoqda.
“Men Yevropa Ittifoqining kengayishi g‘oyasini qo‘llab-quvvatlayman. Tashkilotning sharqqa tomon kengayishda davom etayotgani barchamiz uchun foydalidir”, — dedi Germaniya kansleri.
Yevropa Ittifoqi davlat va hukumat rahbarlari 23-iyun kuni Bryusselda bo‘lib o‘tgan sammitda Ukraina va Moldovaga ittifoqqa a’zo bo‘lish uchun nomzod maqomini berishni ma’qullagandi. Qo‘shilish bo‘yicha muzokaralarni boshlash uchun davlatlar qator shartlarni, jumladan, islohotlarni bajarishi kerak.
Nomzod maqomini olish Yevropa Ittifoqiga qo‘shilish yo‘lidagi ancha uzoq yo‘lning boshlanishi hisoblanadi. Turkiya 1999-yildan, Shimoliy Makedoniya 2005-yildan, Chernogoriya 2010-yildan, Serbiya esa 2012-yildan beri nomzod. Xorvatiya 2013-yilda Yevropa Ittifoqiga qo‘shilgan oxirgi davlat bo‘ldi, bu jarayon o‘n yil davom etgan.
