Gaz quduqlaridan isteʼmolchigacha bo‘lgan tizim to‘liq raqamlashtiriladi

 

O‘zbekistonda kuz-qish mavsumida aholiga 10 milliard kub metr tabiiy gaz yetkazib beriladi. Bu haqda prezident Shavkat Mirziyoyev ishtirokida o‘tkazilgan kuz-qish mavsumida iqtisodiyot tarmoqlari va ijtimoiy soha muassasalarining barqaror ishlashini taʼminlash bo‘yicha yig‘ilishda maʼlum qilindi.

 

Qayd etilishicha, Hukumat qarori qarori bilan, har bir viloyat, tuman va yo‘nalishlar kesimida alohida reja-jadvallar va chora-tadbirlar ishlab chiqilib, manbalari belgilangan.

 

Taʼkidlanishicha, aholini, avvalo, elektr energiyasi bilan uzluksiz taʼminlash choralari ko‘rilmoqda.Buning uchun IV chorakda 21 milliard kilovatt soat, kelgusi yil boshida qariyb 22 milliard kilovatt soat elektr ishlab chiqarish rejalashtirilgan.

 

Shuningdek, kuz-qish mavsumida aholiga 10 milliard kub metr tabiiy gaz yetkazib berilishi belgilangan.

 

Davlat rahbari bu jarayonda isrofga yo‘l qo‘ymaslik uchun gaz quduqlaridan isteʼmolchigacha bo‘lgan tizimni to‘liq raqamlashtirish bo‘yicha ko‘rsatma berdi.

 

Tabiiy gaz tarmog‘idan uzoqdagi qishloq va ovullar, ijtimoiy obyektlarga suyultirilgan gaz va ko‘mir yetkazib beriladi. Prezident qaysi hududga yana qo‘shimcha zaxira kerak bo‘lsa, taʼminlab berilishini taʼkidladi.

 

“Barcha tarmoq va hudud rahbarlari bu masalada masʼuliyatini ikki karra oshirib, aholini rozi qilishi, hech bir murojaatni eʼtiborsiz qoldirmasdan, tezkor hal etishi lozim”, — deydi Shavkat Mirziyoyev.

 

Energetika vazirligiga aholining energiya manbalari bilan taʼminlanganlik holatini real vaqt tartibida muntazam nazorat qilib borish topshirildi. Yuzaga keladigan muammolarni bartaraf etishda “koll-markaz”lar va hududiy ishchi guruhlar faoliyati muhim ekani qayd etildi.