Shifokorlar faoliyatiga to‘sqinlik qilganlar qamalishi mumkin
Bu bo‘yicha qonunchilikka yangi moddalar kiritilmoqda.
Oliy Majlis Qonunchilik palatasida Ma’muriy javobgarlik to‘g‘risidagi kodeksga qo‘shimchalar kiritishga oid qonun loyihasi ko‘rib chiqilmoqda. Bu haqda deputat Rasul Kusherbayev o‘zining rasmiy telegram kanalida xabar qildi.
Yangi kiritilayotgan 197-7-moddaga ko‘ra, tibbiyot xodimining qonuniy tibbiy faoliyatiga to‘sqinlik qilish yoki shu maqsadda tibbiyot xodimiga turli shaklda qonunga xilof ravishda ta’sir o‘tkazish — fuqarolarga BHMning besh baravaridan yetti baravarigacha, mansabdor shaxslarga esa — yetti baravaridan o‘n baravarigacha miqdorda jarima solishga yoki o‘n besh sutkagacha muddatga ma’muriy qamoqqa olishga sabab bo‘ladi.
Ushbu huquqbuzarliklarni jinoyat ishlari bo‘yicha sudlar tomonidan 3 kunlik muddatda ko‘rib chiqish taklif qilinmoqda.
Ta’kidlanishicha, 2019-2022 yillar davomida O‘zbekistonda 290 ga yaqin holatda tibbiyot xodimlariga nisbatan turli shakldagi tajovuzlar qilingan. Qonun loyihasi tashabbus huquqi asosida Bosh prokuror tomonidan kiritilgan.
