Janubiy Koreya mudofaa vaziri: KXDR yadro quroli qo‘llasa, Kim Chen In rejimi ag‘dariladi
Seul bu bo‘yicha Vashington bilan kelishib oldi.
KXDR tomonidan istalgan yadro hujumi Kim Chen In rejimining tugashiga olib keladi. Bu haqda Janubiy Koreya mudofaa vaziri Li Chjon Sop maʼlum qildi.
U AQSH va Janubiy Koreyaning xavfsizlik masalalari bo‘yicha maslahat uchrashuvi yakuni bo‘yicha bergan bayonotida aytgan.
“Mudofaa vaziri Ostin (AQSH mudofaa vaziri Lloyd Ostin — tahririyat) va men yadro hujumi bo‘lgan taqdirda Kim Chen In rejimi qulashiga va alyansning kuchli javobiga duch kelishini tasdiqladik”, – degan u.
O‘z navbatida, Lloyd Ostin Seul va Vashington qo‘shma mashg‘ulotlarni davom ettirishini maʼlum qilgan.
Koreya yarimorolida eskalatsiya kuchayishi davom etmoqda. Kecha KXDR Yapon dengizi tomonda 3 ta ballistik raketa uchirgan. Ulardan biri qitʼalararo raketa hisoblanadi.
