Navoiyda suv uchun to‘langan pullar “uxlatildi”
Buxgalter 8 oylik to‘lovlarni talon-taroj qilgan.
Karmana tumanida suv iste’moli to‘lovlarining talon-torojligi aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Karmana tuman bo‘limi tomonidan “Navoiy suv ta’minoti” MCHJning murojaatiga asosan tergovga qadar tekshiruv o‘tkazilgan. Unda MCHJning Karmana tuman bo‘limi yordamchi hisobchisi S.T. 2021 yilning yanvar-avgust oylari davomida abonentlardan suv iste’moli uchun qabul qilingan jami 109,9 mln so‘m to‘lovlarni o‘zlashtirish yo‘li bilan talon-toroj qilganligi aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
