Qashqadaryoda avtobus ag‘darilib ketdi
Avtobus ichida 10 dan ortiq yo‘lovchi bo‘lgan.
7 noyabr kuni soat 09:45 larda Qashqadaryo viloyati Shahrisabz shahrida “Shahrisabz-Miraki” yo‘lining 1-kilometrida yo‘lovchi tashuvchi avtobus ag‘darilib ketgan. Bu haqda viloyat transport boshqarmasi xabar berdi.
Xabarga ko‘ra, ushbu yo‘l-transport hodisasi avtobus haydovchisining rul boshqaruvini yo‘qotishi natijasida yuzaga kelgan.
Hodisa oqibatida hech kim jarohat olmagani aytilmoqda.
Qashqadaryo viloyati transport boshqarmasiga ko‘ra, “Isuzu” rusumli avtobus Shahrisabz shahridan Shahrisabz tumanining Qutchi qishlog‘iga doimiy yo‘lovchi tashib kelgan. Ushbu transport vositasining yo‘lovchi tashish huquqini beruvchi litsenziya varaqasi mavjud.
Maʼlum bo‘lishicha, yo‘l-transport hodisasi vaqtida avtobus salonida 10 dan ortiq yo‘lovchi bo‘lgan, ularga jiddiy zarar yetmagan.
Holat bo‘yicha huquq-tartibot organlari tomonidan surishtiruv ishlari olib borilmoqda.
