Xalqaro kinofestivalda O‘zbekiston 4 ta mukofotga sazovor bo‘ldi

 

Belarus poytaxtida 7-11 noyabr kunlari bo‘lib o‘tgan Listapad xalqaro kinofestivalida jami 40 dan ortiq davlat va 100 ga yaqin filmlar ishtirok etdi. Yakunlash marosimida O‘zbekiston 3 ta xalqaro mukofotga sazovor bo‘ldi.

 

“Listapad” kinofestivalining “Eng yaxshi rejissyor uchun” mukofoti Shuhrat Mahmudovning “Matonat” hujjatli filmiga topshirildi. Film Ikkinchi jahon urushi yillarida Germaniyaning “Amersfort” lageridagi 101 nafar o‘zbekistonlik askarlarning jasorati va shijoatiga bag‘ishlangan.

 

Rejissyor Dilmurod Masaidov tomonidan suratga olingan “Ayol  qismati” badiiy  filmi “Insonparvarlik va umuminsoniy qadriyatlar mavzusining dolzarbligi uchun” nominasiyasida maxsus mukofotga sazovor bo‘ldi. Film Suriyada jangarilar tomonidan aldanib, ozodlik sari qiyin yo‘lni bosib o‘tgan ayol haqida hikoya qiladi.

 

Eslatib o‘tamiz, ushbu oyda bu kartina Turkiyada o‘tkazilgan “Qo‘rqut ota” xalqaro kinofestivalida “Eng yaxshi badiiy film” Gran-prisiga ham sazovor bo‘lgandi.

 

Yosh kinorejissyor Akrom Shahnazarov tomonidan suratga olingan “101 reys” badiiy filmi esa davlatlararo “Mir” teleradiokompaniyasining “Kino tili – do‘stlik tili” nominatsiyasining maxsus mukofoti bilan taqdirlandi.

 

MDH davlatlari kinematograflarining ishchi yig‘ilishida O‘zbekiston Kinematografiya agentligi bosh direktori Firdavs Abduxoliqov MDH Ijroiya qo‘mitasining “MDHga a’zo davlatlar kinematografiya sohasidagi hamkorligini rivojlantirishga qo‘shgan shaxsiy hissasi uchun” diplomi bilan taqdirlandi. 

 

O‘zbekiston MDH davlatlari orasida ishlab chiqarilayotgan qo‘shma mahsulotlar (ko-produksiya) soni bo‘yicha yetakchi deb tan olingan. Aynan shuning uchun ham Minskda bo‘lgan Kinematografiya rahbarlari  yig‘ilishida MDH davlatlari kinematograflari xalqaro ijodiy alyansi shtab-kvartirasini O‘zbekiston raisligida Toshkent shahrida joylashtirish to‘g‘risidagi qaror bir ovozdan qabul qilingan.