Sirdaryoda yo‘lga ajratilgan 1 mlrd “yeb yuborildi”
Holat bo‘yicha 10 kishiga ayblov e’lon qilingan.
Davlat xavfsizlik xizmatining Sirdaryo viloyati bo‘yicha Boshqarmasi va Xovos transport prokuraturasi hamkorligida yo‘l infratuzilmasi ob’yektlarida qonun buzilishi holatlarini aniqlash yuzasidan tezkor tadbirlar o‘tkazilgan. Buning natijasida “Sirdaryo yo‘llardan muntazam foydalanish” unitar korxonasining sobiq mansabdor shaxslari tomonidan 2018-2021 yillarda avtomobil yo‘llarini ta’mirlash uchun ajratilgan byudjet mablag‘lari, ishchi xodimlarning ish haqlari va rag‘batlantirish pullari — jami 1 mlrd 006 mln 792 ming 703 so‘m talon-toroj qilinganligi aniqlangan.
Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilgan hamda korxonaning sobiq rahbari X.O., sobiq bosh hisobchisi S.Sh., sobiq hisobchisi X.S., sobiq bo‘lim boshlig‘i M.Sh. va yana 10 nafar shaxsga nisbatan ayblov e’lon qilinib, sud idoralariga yuborilgan.
Jinoyat ishlari bo‘yicha Sayxunobod tuman sudining hukmiga ko‘ra, aybdorlarga ozodlikdan mahrum qilish, ahloq tuzatish ishlari hamda qonunchilikda belgilangan boshqa jazo turlari tayinlangan.
Talon-toroj qilingan pullardan 767 mln 753 ming 402 so‘mi sud va tergov davrida davlat foydasiga undirilgan, qolgan 239 mln 039 ming 301 so‘mi Majburiy ijro byurolariga majburiy tartibda undirish uchun yuborilan.
