Japarov O‘zbekiston bilan Kampir Obod suv ombori bo‘yicha kelishuv haqida gapirdi
Qirg‘iz muxolifati kelishuvlar noqonuniy amalga oshirilayotganini aytdi.
Qirg‘iziston Prezidenti Sadir Japarov mamlakat parlamentida o‘zbek—qirg‘iz chegarasi borasidagi kelishuv bo‘yicha chiqish qildi.
«Bunday tarixiy kunda yashirinmasdan, ushbu masala haqida o‘z fikrimni aytishga qaror qildim», — deydi Japarov. «Kampir Oboddagi 4127 gektar yer O‘zbekiston bilan 1965-yilda almashilgan.»
«Ayrim fuqarolar Kapmir-Oboddagi suv qurib qolsa, uning ostidagi yer O‘zganda qolsin demoqda. Birinchidan, suv qurimaydi, u asrlar davomida oqadi. Ikkinchidan, suv ombori qurib qolgan taqdirda ham bu vaqtda biz teng tomonlama almashinuvni amalga oshira olamiz, ular bundan faqat xursand bo‘ladi.
Uchinchidan, baʼzi fuqarolar ushbu bitimga O‘zbekistonga boshqa yer berish kerakligi, suv oldidagi yerni tortib olish haqida baqir-chaqir qilyapti. O‘zbeklarning kallasi yaxshi ishlaydi, shu sababli ular 30-40 yil oldinga ilgarilab ketgan. Biz esa faqat baqirish bilan shug‘ullanyapmiz», — deydi prezident.
«Butun Qirg‘iziston» muxolifat fransiyasi yetakchisi Adaxon Madumarov esa o‘zbek—qirg‘iz chegarasi bo‘yicha bitim noqonuniy ravishda ko‘rib chiqilayotganini maʼlum qildi.
Madumarov bitimning ratifikatsiyasi uchun Qirg‘iziston Konstitutsiyaviy sudi xulosasi kerakligini taʼkidlaydi. Uning aytishicha, hozirgi hukumat ketsa, keyingisi ushbu qaror “majburlikdan” qabul qilingan deb tan oladi.
Qirg‘iziston adliya vaziri Ayoz Bayetovning hech qanaqa xulosa kerak emasligini bildirgan. U bunday xulosa faqat «noaniqlik bo‘lganida va murojaat qilinganida» lozimligini aytgan.
«Konstitutsiyaviy sud hurmat qilinganida, hukumat unga murojaat qilgan bo‘lardi. Tashabbuskor parlament emas, balki hukumat. Shunday bo‘lsa, Konstitutsiya va qonunlarni olib tashlanglar», — degan Madumarov unga javoban.
Mamlakat Milliy xavfsizlik davlat qo‘mitasi raisi Qamchibek Tashiyev Madumarovga javob qaytarib, hukumat o‘z harakatlariga javob berish va davlat manfaatlarini himoya qilishga tayyorligini qayd etgan.
«Boshqa hukumat kelsa, peshonamizga nima yozilganini ko‘ramiz. Biz qonun doirasida, davlat va fuqarolar manfaatidan kelib chiqyapmiz», — deya qayd etgan u.
