Navoiyda soliq idorasi xodimlari qamoqqa olindi
Hozirda ularga nisbatan jinoyat ishi ochilgan.
Ijtimoiy tarmoqlarda Navoiy viloyat soliq boshqarmasi savdo bo‘limi xodimlari pora bilan qo‘lga tushgani haqida xabar tarqaldi. Holat yuzasidan viloyat prokuraturasi rasmiy munosabat bildirdi.
Qayd etilishicha, Navoiy viloyat Davlat soliq idorasi xodimlari Z.A va B.Shlar MCHJga qarashli kafeda o‘tkazilgan sayyor soliq tekshiruvi natijasini tadbirkor foydasiga ijobiy hal qilib berish evaziga 10000 AQSH dollari talab qilgan. Ular 18 noyabr kuni Navoiy shahrida huquqni muhofaza qiluvchi organlar tomonidan o‘tkazilgan tezkor tadbirda kimyoviy ishlov berilgan 9000 AQSH dollarini jamiyat rahbaridan olgan vaqtida ashyoviy dalillar bilan ushlangan.
Mazkur holat yuzasidan Z.A va B.Sh.larga nisbatan O‘zbekiston Respublikasi JKning 210-moddasi 2-qismi bilan jinoyat ishi qo‘zg‘atilgan.
Jinoyat ishi yuzasidan Navoiy viloyat prokuraturasi tomonidan olib borilayotgan tergov harakatlari davomida “Qamoqqa” olish tarzidagi ehtiyot chorasi qo‘llanilgan.
