Jizzaxda sifatsiz go‘sht saqlanayotgan uy aniqlandi
Xonadon egasi ularni pullayotgan vaqtida qo‘lga tushgan.
Iste’molga yaroqsiz go‘sht mahsulotlarining sotuvga qo‘yilishining oldi olindi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Zarbdor tuman bo‘limi tomonidan IIB hamda tuman Veterinariya va chorvachilikni rivojlantirish bo‘limi xodimlari bilan hamkorlikda tezkor tadbir o‘tkazilgan. Unda fuqaro Z.P. fuqaro D.D.ga Jizzax shahar “Toshloq” MFY hududidagi xonadonida iste’molchilar hayoti va sog‘ligi xavfsizligi talablariga javob bermaydigan 201 kg yirik shoxli mol go‘shtini 8,6 mln so‘mga sotishga kelishib, shundan 6 mln so‘mni olgan vaqtida ushlangan. Fuqaroning xonadoni ko‘zdan kechirilganda birlamchi veterinariya hujjatlariga ega bo‘lmagan jami 73 dona qoramol tuyog‘i va 61,3 kg iste’molga yaroqsiz go‘sht mahsulotlari borligi aniqlanib, ashyoviy dalil sifatida olingan.
Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.
