Sirdaryoga hokim vazifasini bajaruvchi tayinlandi
Bu bo‘yicha Prezident Farmoni qabul qilindi.
Prezidentning tegishli Farmoni bilan Maxmudaliyev Akmaljon Azimjonovich zimmasiga Sirdaryo viloyati hokimi vazifasini bajarish yuklatildi. Bu haqda “O‘zA” axborot agentligi xabar qilmoqda.
Bosh vazir Abdulla Aripov hamda Prezident Administrasiyasi rahbari Sardor Umurzakov ishtirokida Sirdaryo viloyatida bo‘lib o‘tgan yig‘ilishda mazkur farmon matni o‘qib eshittirilgan va yangi hokim jamoaga tanishtirilgan.
A.Maxmudaliyev ko‘p yillar davlat idoralarida mehnat qilib, katta tajriba to‘plagan. Vazirlar Mahkamasi mas’ul xodimi, Farg‘ona viloyatining Uchko‘prik tumani hokimi, Navoiy viloyati hokimining qishloq va suv xo‘jaligi masalalari bo‘yicha o‘rinbosari lavozimida ishlagan.
Eslatib o‘tamiz, Sirdaryo viloyatining sobiq hokimi Mirzayev Gʻofirjon Gʻaniyevich Prezident maslahatchisi lavozimiga tayinlangandi.
