Sirdaryorda fermer fuqaroni 280 mlnga chuv tushirdi
Hozirda holat yuzasidan jinoyat ishi ochilgan.
Sirdaryo tumanida fuqaroning 280 mln so‘mini qo‘lga kiritgan fermer xo‘jaligi rahbari aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Sirdaryo tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Unda “S.M.” fermer xo‘jaligi rahbari B.O‘. xo‘jalikning “Paxtachilik va g‘allachilik” uchun ajratilgan 94,9 gektar yer maydonida sholi ekish va ijaraga berishga vakolati bo‘lmasada, aldov yo‘li bilan o‘zganing mulkini qo‘lga kiritish maqsadida 60 gektar yer maydonini “Sholi” ekish uchun fuqaro I.D.ga ijaraga berishga kelishib, yozma tilxat asosida 280 mln so‘m naqd pulini olib, o‘zining shaxsiy ehtiyojlari uchun ishlatib yuborganligi aniqlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
