Surxondaryoda kadastr xodimi jinoyatga qo‘l urdi
Unga nisbatan 2 ta modda bila ish qo‘zg‘atilgan.
Fermer xo‘jaligiga tegishli dala yer maydonini soxta hujjatlar orqali o‘zlashtirish holati aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Uzun tuman bo‘limi tomonidan fermer xo‘jaligi rahbarining murojaatiga asosan tergovga qadar tekshiruv o‘tkazilgan. Unda Davlat kadastrlar palatasi Uzun tuman filiali mutaxassisi A.X. 3 nafar fuqaroga soxta hujjatlar asosida “A.P.” fermer xo‘jaligiga tegishli bo‘lgan suvli yer maydoni uchun egalik huquqini beradigan kadastr hujjatlarini tayyorlab berganligi aniqlangan.
Mazkur holat yuzasidan Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) va 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) bilan jinoyat ishi qo‘zg‘atilib, tergov harakatlari o‘tkazilmoqda.
