Denovda 6 kishi “Damas” haydovchisini do‘pposladi
Viloyat prokuraturasi hodisa sababini ma’lum qildi.
Ijtimoiy tarmoqlarda Surxondaryo viloyatining Denov tumanida ikki kishi ayovsiz kaltaklangani haqida xabarlar tarqaldi. Holat yuzasidan viloyat prokuraturasi rasmiy bayonot berdi.
Holat joriy yilning 11 noyabr kuni soat 12:30 larda Denov shahar “Jomiy” mahallasi hududidan o‘tuvchi avtomobil yo‘li bo‘yida yuz bergan. Shu mahallada yashovchi fuqaro A.U. boshqaruvidagi “Damas” rusumli avtomashinasi bilan ichki yo‘ldan avtomobil yo‘liga harakatlanib chiqqan vaqtida “VAZ” furgon rusumli avtomashinasi bilan yo‘l talashib, furgon avtomashinasi haydovchi voyaga yetmagan E.M. va oldi yo‘lovchi B.S. bilan o‘zaro tortishib, janjalashib urishgach, tarqalishgan.
Oradan 2 soat o‘tib, taxminan 14:30 larda E.M., B.S. o‘zlarining jinoiy sheriklari, B.A., Sh.M., A.A., B.Sh.lar bilan birgalikda Denov tumani “Jomiy” mahallasida joylashgan fuqaro A.U.ning “Baraka” nomli savdo do‘koni yonida A.U. va U.A. bilan janjallashib qolishib, bir-birlariga tan jarohati yetkazgan.
Mazkur holat yuzasidan Denov tuman IIB huzuridagi Tergov bo‘limi tomonidan Jinoyat kodeksining 277-moddasi 2-qismi “b” bandi (bezorilik) bilan jinoyat ishi qo‘zg‘atilgan bo‘lib, hozirda dastlabki tergov harakatlari olib borilmoqda.
Jinoyat ishining tergovi ustidan prokuror nazorati o‘rnatilgan.
