Bobur Bobomurod bilan ijodiy uchrashuv

 

Toshkent shahar, Mirzo Ulug‘bek tumanidagi 338-maktabda shoir Bobur Bobomurod bilan ijodiy uchrashuv bo‘lib o‘tdi.

 

“Nazm gulshani” deb nomlangan badiiy kecha qishning sovuq kunlarida o‘tkazilgan bo‘lishi qaramay, o‘quvchilarda iliq taassurot qoldirdi. Tadbir davomida ishtirokchilar shoirning so‘ngi ijod namunalarini ijro etishdi. Shuningdek, qiziqarli tarzda tashkil etilgan sahna ko‘rinishi ham tomashabinlarning olqishiga sazovor bo‘ldi. O‘zaro badiiy muloqot avvalida o‘quvchilar tomonidan ijro etilgan kuy-qo‘shiqlar ham aynan Bobur Bobomurod ijodi asosida sahna yuzini ko‘rdi.

 

Shundan so‘ng, maktabning sheʼriyatga oshno o‘quvchilari ifodali sheʼr o‘qish bo‘yicha bellashishdi. Bir-biridan qiziqarli va kuchli hayajon bilan o‘qilgan sheʼrlar tadbirga o‘zgacha ruh bag‘ishladi. O‘quvchilarning ijrolarini Bobur Bobomurodning o‘zi baholadi.

 

Tadbirda Bobur Bobomurod ijod olamiga kirib kelishi va bugungi faoliyati haqida o‘quvchilarga so‘zlab berdi. Buxoro zaminida tug‘ilib o‘sgani, kitobga mehr qo‘ygani va birinchi yozgan sheʼri haqidagi xotiralar ko‘pchilikning ko‘z o‘ngida yaqin yillar tasvirini jonlantirdi:

 

“Ijod olamiga kirib kelishimga buvim sababchi bo‘lgan. Bolaligimda kutubxonachi bo‘lishni orzu qilganman. Shunchalik ko‘p kitobing bo‘lsaki, ularni o‘qib tugatolmasang. Biroq, mana yillar o‘tib ijodkor bo‘lib shakllandim. Ammo, hozirgi yutuqlarimda kitoblarning o‘rni beqiyos. Hozir ham kutubxonalarga intiladim. Kitob o‘qishga shoshilaman. Kitob bizni ezgu maqsad sari undovchi yo‘lboshchi. Shuning uchun kitob bilan do‘st tutining, kitob o‘qishni hech qachon kanda qilmang”, — dedi shoir.

 

Bundan tashqari uchrashuvning savol-javoblar qismida o‘quvchilar o‘zlarini qiziqtirgan bir qancha savollarga javob olishga muvaffaq bo‘lishdi.