Gulistondagi oziq-ovqat omborida yong‘in chiqdi
Holat bo‘yicha FVV ma’lumot berdi.
Bugun, 10-dekabr kuni Sirdaryo viloyatining Guliston shahridagi omborxonada yong‘in chiqdi. Holat yuzasidan Favqulodda vaziyatlar vazirligi Matbuot xizmati rasmiy ma’lumot berdi.
Qayd etilishicha, soat 19:23 da Guliston shahrining 4-mavzesida joylashgan oziq-ovqat do‘konining omborxonasida yong‘in sodir bo‘layotganligi to‘g‘risida viloyat FVBga xabar kelib tushgan. Shunga ko‘ra, 2 ta yong‘in-qutqaruv ekipaji soat 19:25 da voqea joyiga yetib borib, yong‘in soat 19:27 da qurshab olingan va soat 19:30 da o‘chirilgan.
Hodisa oqibatida tan jarohati olgan va halok bo‘lganlar yo‘q. Do‘kon omborxonasining tahminan 30 kvadrat metr maydonda tom va shift qismi yonib zararlangan.
Hozirda yong‘inni kelib chiqish sababi va moddiy zarar miqdori aniqlanmoqda.
