Litva Belarus bilan chegarani videokuzatuv bilan taʼminlaydi
Hozirda ikki davlat chegarasida balandligi 4 metrlik panjara bor
Joriy yil oxirigacha Litva Belarus bilan chegaraning butun perimetri bo‘ylab mobil vositalar yordamida videokuzatuvni taʼminlaydi. Bu haqda Litva ichki ishlar vazirligi maʼlum qildi.
“Yil oxiriga qadar Belarus bilan chegaraning 94 foizi stansionar videokuzatuv tizimlari bilan jihozlanadi. Qolgan 6 foizi — qariyb 40 kilometri mobil vositalar orqali chegarachilar ixtiyorida nazorat qilinadi”, — deyiladi xabarda.
Belarus bilan chegarani 100 foiz video nazorat bilan jihozlash rejasi butlovchi qismlarni yetkazib berish bilan bog‘liq vaziyat tufayli to‘liq amalga oshirilmaydi. Jahon bozorlaridagi vaziyat tufayli taʼminot zanjirlari uzildi, shuning uchun qisman stansionar emas, balki mobil vositalardan foydalanish kerak bo‘ladi.
Litva–Belarus chegarasining uzunligi taxminan 680 km. Suv havzalaridan o‘tmaydigan joylarda to‘siq qurilib, u videokuzatuv tizimlari bilan jihozlangan. Litva 4 metr balandlikda metalldan yasalgan, mahkamlangan panjara qurdi, uning ustida tikanli sim o‘rnatilgan. To‘siq oldiga balandligi uch metr bo‘lgan qo‘shimcha tikanli sim bor.
