Urganchda reklama afishasiga urilgan Cobalt yonib ketdi
Holat yuzasidan FVB maʼlumot berdi.
Bugun, 10-dekabr kuni Xorazm viloyatining Urganch shahrida Cobalt yonib ketdi. Holat yuzasidan viloyat Favqulodda vaziyatlar boshqarmasi maʼlumot berdi.
Qayd etilishicha, hodisa soat 20:22 larda Urganch shahrining Al-Xorazmiy ko‘chasida yuz bergan. 2001-yilda tug‘ilgan fuqaro R. B. Cobalt rusumli avtomobilda harakatlanayotib, eʼtiborsizligi oqibatida boshqaruvni yo‘qotgan va yo‘lning o‘ng tomonidagi reklama afishasiga borib urilgan. Shundan so‘ng transport vositasining motor qismida yong‘in kelib chiqqan.
Voqea joyiga yong‘in-qutqaruvchilar soat 20:25 da yetib borib, yong‘inni 20:28 da bartaraf qilishgan. Mazkur yong‘in yo‘l transport hodisasi natijasida yuzaga kelgan. Oqibatda tan jarohati olgan va halok bo‘lganlar yo‘q.
