Pokiston — Afg‘oniston chegarasi yana notinch
Bu “Tolibon” hokimiyatga kelgandan buyon eng kuchli to‘qnashuv bo‘lgani aytilmoqda.
Pokiston armiyasi bayonotida aytilishicha, afg‘on chegarachilari Chamandagi tinch aholiga qarata o‘zboshimchalik va maqsadsiz og‘ir qurollardan o‘q uzgan.
Pokiston chegarachilari bu bosqinchilik harakatiga javob berdi. Buning oqibatida 6 nafar tinch aholi halok bo‘lgan, 17 nafari yaralangan.
Bayonotda qo‘shimcha qilinishicha, Pokiston Afg‘oniston hukumatini mintaqadagi vaziyatning jiddiyligidan xabardor qilgan va kelajakda shu kabi hodisalarning oldini olish uchun keskin choralar ko‘rishni talab qilgan.
Afg‘oniston Qandahor politsiya departamenti matbuot kotibi Hoji Juma Gul Nurziy matbuotga bergan intervyusida, Pokiston harbiylari chegaradagi Shiro Oba qishlog‘ida "Tolibon"ning politsiya bo‘limi qurishini to‘xtatmoqchi bo‘lganini aytdi. Tomonlar o‘rtasida mojaro kelib chiqqan.
Nurziyning aytishicha, dastlabki maʼlumotlarga ko‘ra, 1 nafar "Tolibon" vakili halok bo‘lgan, 6 nafari yaralangan.
"Tolibon" rasmiylariga ko‘ra, hodisa oqibatida 3 nafar tinch aholi jarohatlangan.
