Ukrainaga qishda omon qolishga yordam berishimiz kerak — Makron
Parijda “Ukraina xalqi bilan birdamlik” konferensiyasi bo‘lib o‘tmoqda.
Ukraina joriy qishdan omon qolish uchun yordamga muhtoj hamda ko‘mak juda tez va aniq bo‘lishi kerak. Bu haqda Parijda “Ukraina xalqi bilan birdamlik” donor konferensiyasining ochilishida Fransiya prezidenti Emmanuel Makron aytib o‘tdi.
“Hamma Ukraina bilan birdam va yelkama-yelka bo‘lish, yordamini bir daqiqaga ham susaytirmaslik istagini isbotlash uchun safarbar bo‘lmoqda. Bu faqat Ukraina uchun kurash emas, bu — barqarorligimiz uchun xalqaro kurash ”, — dedi Fransiya rahbari.
Uning taʼkidlashicha, endilikda hamma Ukraina xalqiga yordam berish muhimligini tushunishi kerak.
“Biz Ukrainaga qishda omon qolishga yordam berishimiz lozim. Konferensiya natijalari juda aniq bo‘lishini istaymiz”, — dedi Makron.
Tadbirda Ukrainaning hamkorlari, do‘stlari va xalqaro gumanitar tashkilotlarda ishlayotganlarni safarbar etish, aholini suv, elektr, issiqlik, kiyim-kechak bilan taʼminlashga yordam beradigan tadbirlarni tashkil etish haqida so‘z boradi.
Shuningdek, prezident 700 dan ortiq fransuz korxonalari Kiyevga uzoq muddatli sarmoya kiritishda ishtirok etishini aytdi.
Eslatib o‘tamiz, Parijdagi “Ukraina xalqi bilan birdamlik” konferensiyasi Rossiyaning mamlakat energetika infratuzilmasiga bergan zarbalari munosabati bilan mamlakatga qo‘shimcha xalqaro yordam berishga bag‘ishlangan.
