Surxondaryoda svetofor ishlamagani sabab avtohalokat sodir bo‘ldi
Qurbonlar va jarohatlanganlar haqida maʼlumot berildi.
Surxondaryo viloyati IIB Matbuot xizmatining xabariga ko‘ra, 19-dekabr kuni soat 07:30 larda M-41 avtomobil yo‘lining 1609-kilometrida Termiz—Denov yo‘nalishida harakatlanib ketayotgan Nexia-3 bilan yana bir Nexia o‘zaro to‘qnashgan.
Maʼlumotlarga ko‘ra, Nexia-1 haydovchisi va bir nafar yo‘lovchisi olgan tan jarohati oqibatida voqea joyida vafot etgan. Qolgan uch nafar yo‘lovchi va Nexia-3‘ning haydovchisi og‘ir tan jarohati bilan shifoxonaga yotqizilgan.
O‘rganishlar davomida aniqlanishicha, chorrahada vaqtinchalik elektr energiyasi uzib qo‘yilgani sabab o‘rnatilgan svetoforning ishlamagan. Yo‘l belgilari bilan tartibga solingan ushbu chorrahada Nexia-1 avtomobili asosiy yo‘ldan harakatlanib kelayotgan Nexia-3‘ga yo‘l bermasdan, harakatlanib chiqib kelgan.
Xabarda svetoforning noqonuniy elektr tarmog‘iga ulangani uchun tarmoqdan ajratib qo‘yilgani qayd etilgan.
Holat yuzasidan JKning 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan.
