Jizzaxda Yangi yil archasi yonib ketdi
Holat bo‘yicha FVB maʼlumot berdi.
Bugun, 22-dekabr kuni Jizzax shahrida bozor hududiga o‘rnatilayotgan Yangi yil archasi yonib ketdi. Holat bo‘yicha viloyat Favqulodda vaziyatlar boshqarmasi maʼlumot berdi.
Qayd etilishicha, soat 18:01 da viloyat Favqulodda vaziyatlar boshqarmasi Navbatchilik qismiga Jizzax shahar Mirzo Ulug‘bek mahallasi Toshkent ko‘chasi hududida joylashgan “Markaziy dehqon bozori”ning avtoturargohida bozor maʼmuriyati tomonidan o‘rnatilayotgan “Yangi yil archasi”da yong‘in sodir bo‘layotganligi to‘g‘risida xabar kelib tushgan. Xabarga ko‘ra, zudlik bilan FVBning 2 ta yong‘in-qutqaruv ekipaji voqea joyiga yetib borgan. Ushbu yong‘in fuqarolar tomonidan o‘chirib olingan.
Yong‘in oqibatida archaning 40 sm yuqori qismi yonib zararlangan. Maʼlum bo‘lishicha, bezak sifatida o‘rnatilayotgan chiroqlarni yoqib sinovdan o‘tkazish vaqtida yong‘in sodir bo‘lgan.
Fuqarolarning kuyish tan jarohati olish va halok bo‘lish holatlari qayd etilmagan.
