Shavkat Mirziyoyev Saudiya Arabistoni investitsiyalar vaziri bilan uchrashdi
Muzokaralarda Markaziy Osiyoda yirik infratuzilmaviy loyihalarni ilgari surish masalalari muhokama qilingan.
Bugun, 23-dekabr kuni O‘zbekiston Respublikasi Prezidenti Shavkat Mirziyoyev Saudiya Arabistoni Podshohligi investitsiyalar vaziri Holid al-Falih boshchiligidagi delegatsiyani qabul qildi. Bu haqda Prezident matbuot xizmati xabar qilmoqda.
Ko‘p qirrali O‘zbekiston-Saudiya hamkorligini yana-da kengaytirish, eng avvalo, O‘zbekiston Prezidentining joriy yil avgust oyidagi Saudiya Arabistoniga tashrifi davomida erishilgan kelishuvlarni amalga oshirishning dolzarb masalalari ko‘rib chiqildi.
Uchrashuv avvalida investitsiyalar vaziri samimiy qabul uchun O‘zbekiston yetakchisiga minnatdorlik bildirib, Saudiya Arabistoni Podshohi Salmon bin Abdulaziz Ol Saud va Valiahd, Bosh vazir Muhammad bin Salmon Ol Saudning salomi va eng ezgu tilaklarini yetkazdi.
O‘zbekiston rahbari ikki tomonlama munosabatlar jadal rivojlanib borayotganini alohida mamnuniyat bilan qayd etdi. Jumladan, joriy yil boshidan o‘zaro savdo hajmi qariyb 10 barobar oshdi. Mamlakatda Saudiya investitsiyalari ishtirokida 40 ta korxona tashkil etilgan.
Birgalikda energetika, kimyo sanoati, qishloq xo‘jaligi, bank, telekommunikatsiyalar, tibbiyot va turizm sohalarida yirik loyihalar amalga oshirilmoqda. Saudiya taraqqiyot fondi ko‘magida sog‘liqni saqlash, taʼlim va suv taʼminoti sohalarida qator ijtimoiy ahamiyatga ega dasturlar ro‘yobga chiqarilmoqda.
Bugun Saudiya Arabistonining 30 dan ortiq yetakchi kompaniyasi ishtirokida o‘tgan biznes forumining samarali yakunlari yuksak baholandi. “ACWA Power” kompaniyasi bilan Qoraqalpog‘istonning Qo‘ng‘irot tumanida uchta shamol elektr stansiyasini qurish bo‘yicha investitsiya bitimi imzolangani tadbirning muhim natijalaridan biri bo‘ldi.
Muzokaralar chog‘ida Markaziy Osiyo mintaqasida yirik infratuzilmaviy loyihalarni ilgari surish masalalari ham muhokama qilindi.
Boshlangan investitsiya loyihalarining bajarilishini jadallashtirish va yangilarini tayyorlash borasidagi, shu jumladan, Ishbilarmonlar kengashi doirasidagi hamkorlikni yana-da faollashtirishga kelishib olindi.
