Amir Temur tug‘ilgan qishloqda ochiq osmon ostidagi muzey tashkil qilinmoqda
Hozirda loyihaning ilk bosqichi amalga oshirilgan.
Qashqadaryo viloyatining Yakkabog‘ tumanidagi Amir Temur tug‘ilgan joyda ochiq osmon ostidagi muzey tashkil qilinmoqda. Bu haqda viloyat turizm va madaniy meros bosh boshqarmasi xabar berdi.
Qayd etilishicha, Xo‘ja Ilg‘or qishlog‘ida amalga oshirilayotgan ushbu loyihaning dastlabki bosqichida o‘tov uylari, manzilga yo‘naltiruvchi belgi hamda Temuriylar saltanatining ramzlari va urf-odatlarini ifodalovchi buyumlar olib kelinib, hududga o‘rnatilgan.
Shuningdek, mazkur hudud atrofida mevali va manzarali daraxt ko‘chatlari ekilib, obodonlashtirish ishlari olib borilgan.
O‘tovning ichki qismi ham to‘liq jihozlanib, qadimiy gilam, kashtalar, mis ko‘za, lavh, beshik, ko‘rpachalar homiylar tomonidan taqdim etilgan.
Loyihaning navbatdagi bosqichlarida ochiq osmon ostidagi muzey hamda xizmat ko‘rsatish obyektlari yaratiladi.
