Gulistondagi dorixonada tunda bosqinchilik uyushtirilgani aytildi
Dorixona sotuvchisini nomaʼlum shaxslar mashinaga solib olib ketgan.
Ijtimoiy tarmoqlarda Sirdaryo viloyatining Guliston shahrida joylashgan dorixonada bosqinchilik yuz bergani aytilgan video tarqaldi. Holatga viloyat IIB rasmiy munosabat bildirdi.
Maʼlum bo‘lishicha, fuqaro D.R. turmush o‘rtog‘iga S.T.ning betobligi sababli ayollarga kerakli bo‘lgan dorini do‘stlari oldida so‘ramaslik maqsadida sotuvchi Yu.T.ga yaqinroq kelishini talab qilgan. Shu vaqtda ular o‘zaro gap talashib qolgan va natijada videolavhadagi holat yuz bergan.
Mazkur holat 26 dekabr kuni soat 02:39 da 102 xizmatiga berilgan xabarga asosan ro‘yxatga olingan va Guliston shahar IIB xodimlari tomonidan voqea ishtirokchilari aniqlanib, qonuniy tartibda hujjatlar rasmiylashtirilgan.
“Protsessual harakatlar yakuniga ko‘ra aybdorlarga qonuniy chora ko‘rilib, qonun ustuvorligi taʼminlanadi”, — deyiladi xabarda.
