Namanganda 25 yoshli qiz yonib ketib, vafot etdi
Hodisa bugun ertalab sodir bo‘lgan.
Bugun, 31-dekabr kuni Namangan shahrida xonadonlarning birida yong‘in yuz berdi. Holat yuzasidan viloyat Favqulodda vaziyatlar boshqarmasi maʼlumot berdi.
Qayd etilishicha, soat 07:21 da FVB 101 qisqa raqamiga Namangan shahrining “Baynalminal” MFY hududidagi xonadonda yong‘in sodir bo‘layotgani haqida xabar kelib tushgan. Shunga asosan, soat 07:25 da yong‘in qutqaruv ekipaji voqea joyiga yetib borgan, sodir bo‘lgan yong‘in soat 07: 40 da to‘liq bartaraf etilgan.
Yong‘in vaqtida xonadon egasining qizi — 1 guruh nogironi 1997 yilda tug‘ilgan fuqaroning kuygan holdagi jasadi topilgan. Shuningdek, binoning shift va tom qismidan 25 kvadrat metr joyi hamda uy jihozlari yonib zararlangan.
Hozirda sodir bo‘lgan yong‘in yuzasidan tergovga qadar surishtiruv ishlari olib borilmoqda.
