Kosonsoydagi uyda tunda er-xotin yonib ketdi
Namangan viloyatida bir kechada 4 ta joyda yong‘in chiqqan.
Namangan viloyatida 31 dekabrdan 1 yanvarga o‘tar kechasi 4 ta yong‘in yuz berdi. Holat bo‘yicha viloyat Favqulodda vaziyatlar boshqarmasi maʼlumot berdi.
31 dekabr soat 22:15 da Chust tumani “Laylak uya” MFY hududidagi xonadonlarning birida yong‘in sodir bo‘lgan. Hodisa oqibatida uyning oshxonasida shift va tom qismidan 15 kvadrat metr joyi yonib zararlangan.
1 yanvar soat 01:02 da Namangan tumani “Sho‘rqo‘rg‘on” MFY hududidagi xonadonlarning birida yong‘in chiqqan. Hodisa oqibatida binoning shift va tom qismidan 45 kvadrat metr joyi hamda uy-ro‘zg‘or buyumlari yonib zararlangan.
Soat 01:33 da Norin tumani “Xo‘jaobod” MFY hududidagi xonadonlarning birida yong‘in yuz bergan. Hodisa oqibatida binoning shift va tom qismidan 40 kvadrat metr joyi, uy-ro‘zg‘or buyumlari hamda xonadon egalariga tegishli hujjatlar yonib zararlangan.
Soat 05:00 da Kosonsoy tumani “Navbahor” MFY hududidagi xonadonlarning birida yong‘in sodir bo‘lgan. Hodisa oqibatida binoning shift va tom qismidan 20 kvadrat metr joyi, uy jihozlari yonib zararlangan.
Yong‘in vaqtida xonadon egasining o‘g‘li —1994 yilda tug‘ilgan erkak va uning turmush o‘rtog‘i — 1995 yilda tug‘ilgan ayolning kuygan xoldagi jasadi topilgan.
Hozirda sodir bo‘lgan yong‘inlar yuzasida tergovga qadar surishtiruv ishlari olib borilmoqda.
