Buxorodan Toshkentga kelayotgan “Afrosiyob” poyezdi yo‘lda to‘xtab qoldi
Yo‘lovchilarga chipta narxi to‘liq qaytarib beriladigan bo‘ldi.
Kecha, 1-yanvar kuni Buxoro–Toshkent yo‘nalishidagi “Afrosiyob” poyezdi elektr kuchlanishli sim tarmog‘idagi nosozlik sabab Yangi Chinoz–Chinoz peregon oralig‘ida to‘xtab qoldi. Holat yuzasidan «O‘ztemiryo‘lyo‘lovchi» AJ maʼlumot berdi.
Qayd etilishicha, yo‘lovchilarni manzilga xavfsiz yetkazib kelish maqsadida 20:35 da Toshkent-Shimoliy vokzalidan zaxira «Afrosiob» elektropoyezdi jo‘natilgan va ushbu poyezd Chinoz bekatiga 21:05 yetib borgan. 269 nafar yo‘lovchi zaxira poyezdiga xavfsiz o‘tkazilib, poyezd Toshkent-Markaziy vokzaliga 22:05 da yetib kelgan.
“Yo‘lovchilarga yo‘l davomida qo‘shimcha issiq choy-kofe va oziq-ovqat bepul tarqatildi. 269 nafar yo‘lovchiga chipta narxi to‘liq qaytarib beriladi”, — deyiladi xabarda.
