O‘qishini “perevod” qilmoqchi bo‘lgan talaba 37 mlnga chuv tushdi
Hozirda mazkur holat yuzasidan jinoyat ishi qo‘zg‘atilgan.
Qashqadaryo viloyatining Koson tumanida fuqaroning xorijdagi o‘qishini O‘zbekistonga ko‘chirib berishni vaʼda qilib, uni chuv tushirgan shaxs ushlandi. Holat yuzasidan IIV Kiberxavfsizlik markazi xabar bermoqda.
Maʼlum bo‘lishicha, Telegram messenjerida o‘zini Nodirbek deb tanishtirgan shaxs Qashqadaryo viloyatining Koson tumanida yashovchi R.X.ning Qozog‘iston Respublikasidagi o‘qishini O‘zbekiston Respublikasiga ko‘chirib berishi mumkinligini aytib, buning evaziga 37 mln so‘m pulni ko‘rsatilgan bank kartasiga o‘tkazishi lozimligini tushuntirgan. Shundan so‘ng talab qilingan pullar o‘tkazilishi bilan Telegram-akkaunti o‘chirib tashlangan.
Olib borilgan tezkor-qidiruv tadbirlari natijasida firibgarlik yo‘li bilan pullarni o‘zlashtirgan shaxs Qashqadaryo viloyatining Koson tumanida yashovchi 2002-yilda tug‘ilgan N.M. ekanligi aniqlangan.
Hozirda N.M.ga nisbatan Jinoyat kodeksining 168-moddasi bilan jinoyat ishi qo‘zg‘atilib, tergov harakatlari olib borilmoqda.
