O‘zbekistonda QQS 12 foizga pasaytirilmoqda
Prezident 2023-yilgi soliq siyosatini tasdiqladi.
O‘zbekistonda qo‘shilgan qiymat solig‘i stavkasi 15 foizdan 12 foizga pasaytirilmoqda. Prezident 2023-yilgi soliq siyosatini tasdiqladi.
Maʼlum qilinishicha, aylanmadan olinadigan soliqni unifikatsiya qilish orqali yagona 4 foizlik stavka o‘rnatilib, mavjud pasaytirilgan stavkalarni saqlab qolish taklif qilinmoqda.
Shu bilan birga, aylanmadan olinadigan soliq to‘lovchilarga tovar aylanmasi 500 mln so‘mgacha bo‘lganda yiliga 20 mln so‘m, 500 mln so‘mdan yuqori bo‘lganda 30 mln so‘m miqdorida qatʼiy belgilangan soliqni har oyda teng ulushlarda to‘lashni tanlash huquqi berilmoqda.
Tovar aylanmasi 1 mlrd so‘mdan oshgan kichik biznes toifasiga kiruvchi tadbirkorlar uchun 1 yil davomida foyda solig‘i stavkasini 2 baravarga pasaytiriladi.
Kichik biznesdan o‘rta biznes toifasiga o‘tgan tadbirkorlar uchun 2 yil davomida foyda solig‘i stavkasini 2 baravarga pasaytiriladi.
Jismoniy shaxslar o‘z daromadlarini ipoteka kreditlarini qoplashga yo‘naltirganda soliqqa tortilmaydigan daromadlar miqdori amaldagi yillik 15 mln so‘mdan 73,6 mln so‘mgacha oshiriladi.
2023 yilning 1 aprelidan boshlab jismoniy shaxslarning hayotini uzoq muddatga sug‘urtalash haqini to‘lashga yo‘naltiriladigan jismoniy shaxslarning daromadlari qismida jismoniy shaxslardan olinadigan daromad solig‘i bo‘yicha imtiyozlar bekor qilinmoqda.
Eksport qilishdan olingan daromadlar hajmining ulushidan qatʼi nazar, eksport qilingan tovarlar (xizmatlar) qismiga nisbatan foyda solig‘i va aylanmadan olinadigan soliq solinmasligi belgilanmoqda.
Jismoniy shaxslardan olinadigan mol-mulk solig‘i, cuv resurslaridan foydalanganlik uchun soliq va qishloq xo‘jaligiga mo‘ljallanmagan yer solig‘ining bazaviy stavkalari o‘rtacha 10 foizga indeksatsiya qilinmoqda.
Qatʼiy belgilangan miqdorlarda soliqni to‘lovchi jismoniy shaxslar uchun jismoniy shaxslardan olinadigan daromad solig‘i stavkasi 10 foizga indeksatsiya qilinmoqda.
2023 yil 1 fevraldan boshlab alkogol, tamaki, benzin, dizel va gazni sotishda aksiz solig‘i stavkasi 10 foizga indeksatsiya qilinadi.
Alkogol va tamaki mahsulotlari importi uchun stavkani 5 foizga pasaytirish taklif qilinmoqda.
Noturar ko‘chmas mulk obyektiga ega jismoniy shaxslar suv solig‘ini yakka tartibdagi tadbirkorlar kabi to‘lashga o‘tkaziladi.
Tadbirkorlarni QQSni to‘lashga o‘tkazish tovar aylanmasi 1 mlrd so‘mdan oshgan sanadan boshlab amalga oshirilishi belgilanmoqda. Amalda ushbu chegaraviy summa oshgan oydan keyingi oyning 1-sanasidan o‘tadi.
