23 yoshli talaba “Besh tashabbus” tanlovi o‘tkazaman deb birovning kartasidagi pullarni o‘zlashtirdi
Hozirda unga nisbatan jinoyat ishi qo‘zg‘atilgan.
Qashqadaryolik 23 yoshli talaba buxorolik shaxsni chuv tushirdi. Bu haqda Ichki ishlar vazirligi Kiberxavfsizlik markazi xabar bermoqda.
Qayd etilishicha, Buxoro viloyatining G‘ijduvon tumanida istiqomat qiluvchi 1987-yilda tug‘ilgan I.M. ariza bilan murojaat qilgan. Telegram messenjerida nomaʼlum shaxs unga “Besh tashabbus” ko‘rik tanlovi o‘tkazilayotganini va o‘zi hakamlar hayyati rahbari ekanligini maʼlum qilib, 3 mln so‘m evaziga qimmatbaho sovg‘a yutib olishi mumkinligiga ishontirgan. Shundan so‘ng I.M. pullarni bank kartasi orqali o‘tkazib bergan va u nomaʼlum tarzda yo‘qolib qolgan.
Olib borilgan tezkor-qidiruv tadbirlarida firibgarlik yo‘li bilan pullarni o‘zlashtirgan shaxs Qashqadaryo viloyatining Mirishkor tumanida yashovchi universitet talabasi Q.X. ekanligi aniqlangan.
Hozirda Q.X.ga nisbatan Jinoyat kodeksining 168-moddasi bilan jinoyat ishi qo‘zg‘atilib, tergov harakatlari olib borilmoqda.
