Britaniya Eronning sara maxsus kuchlarini terrorchi tashkilot deb eʼlon qilmoqchi
U bilan aloqada bo‘lganlar jinoiy javobgarlikka tortiladi.
Britaniya hukumati bir necha hafta ichida Eronning Islom inqilobi qo‘riqchilari korpusini terrorchi tashkilot deb eʼlon qilmoqchi. Bu haqda “The Telegraph” yozmoqda.
Maʼlumotlarga ko‘ra, bu qarorni Britaniya Ichki ishlar vazirligi rahbari Suella Braverman va uning o‘rinbosari, xavfsizlik vaziri Tom Tugendxat qo‘llab-quvvatlamoqda. Agar korpus terrorchi tashkilotlar ro‘yxatiga kiritilsa, unga aʼzolik, ramzlarini taqish va faoliyatini qo‘llab-quvvatlash jinoiy javobgarlikka tortiladi. Guruh Eronda sentyabr oyida boshlangan tartibsizliklar chog‘ida qo‘poruvchilik faoliyatiga rahbarlik qilgani aytiladi.
2019-yili Qo‘shma Shtatlar Eron Islom inqilobi qo‘riqchilari korpusini terrorchi tashkilot deb tan olgan va unga qarshi sanksiyalar kiritgan. 2022-yilda Eron hukumati yadroviy kelishuv doirasidagi sanksiyalarni bekor qilishni talab qilgan, biroq keyinchalik bu talabdan voz kechgan. Dekabr oyi oxirida Eronda yetti kishi Britaniya razvedka xizmatlari bilan aloqadorlikda ayblanib hibsga olingandi.
