Surxondaryoda janjal: nega IIB xodimlari ayollarni majburlab avtobusda olib ketdi?

 

Ijtimoiy tarmoqlarda tarqalgan video yuzasidan viloyat IIB rasmiy izoh berdi.

 

Xabarga ko‘ra, joriy yilning 4 yanvar kuni Surxondaryo viloyati, Termiz shahar eski «Yubileyniy» bozor hududida noqonuniy savdo ishlari bilan shug‘ullanuvchi shaxslarni shahar hokimining qarori bilan «Yashil dunyo» savdo markaziga ko‘chirish ishlari amalga oshirilayotganda, bundan oldin yangi hududdan savdo rastalari ajratilib, eski hududni tark etish haqida ogohlantirilganiga qaramasdan bir guruh sotuvchilar norozilik bildirib, hokimiyat vakillariga qarshilik ko‘rsatishgan va jamoat tartibini buzishgan.

 

Holbuki, barcha sotuvchilar 2022 yil davomida bir necha marotaba, oxirgisi joriy yilning 3 yanvar kuni Davlatimiz rahbarining 2017 yildagi PQ-2953-sonli Qaroriga muvofiq hamda shahar hokimining 2018 yildagi Q-1110-sonli Qarori asosida eski bozor hududida 4 yanvar kuni buzish ishlari boshlanishi haqida ogohlantirilgan.

 

Bozor hududiga jamoat tartibini tiklash uchun jalb qilingan Ichki ishlar organlari va Milliy gvardiya xodimlari tomonidan 14 nafar huquqbuzarlar IIBga olib kelingan va ular bilan tushuntirish-profilaktik ishlari olib borilgan.

 

Huquqbuzarlik holati yuzasidan to‘plangan hujjatlar asosida Jinoyat ishlari bo‘yicha Termiz shahar sudi tomonidan 6 nafar fuqaroga BHMning 3 baravari miqdorida, 3 nafar fuqaroga BHMning 5 baravari miqdorida jarima, 4 nafar fuqaroga esa 5 sutka maʼmuriy qamoq jazolari tayinlandi.